|
|
| | | | | Võromaal pikkusõlt kolmas kotussõnimi? |
Terve ilma kõgõ pikemb kotussõnimi om 167-täheline Taimaa pääliina Bangkoki luulõlinõ nimi Krung thep mahanakhon bovorn ratanakosin mahintharayutthaya mahadilok pop noparatratchathani burirom udomratchanivetmahasathan amornpiman avatarnsathit sakkathattiyavisnukarmprasit. Suurõmbal osal paiklikõst inemiisist sääne pikk' nimi meelen ei püsü ja nä ütlese Krung Thep vai lihtsäle Ingliide liin.
Pikkusõlt tõnõ paiganimi om Vahtsõ Meremaa maoorikeeline 85 tähega mäenimi. Tuu om ümbrepantult midägi säänest: «Kotus, kon Tamatea, suuri põlviga miis', kiä käve mäki müüdä, nihut' ja niildse noid, tunnõt ku «maasüüjä», mäng'e flüüti umalõ armsambalõ».
Maailma pikkusõlt kolmandas nimes peetäs ütte Walesi raudtiijaama ja külä nimme, kon om 67 tähte. Sääntside pikki nimmiga kotussõ omma suurõ turistõ ligimeelütäjä.
A ega Võrumaa inemise olõ-i kehvembä ollu! Mõnistõ vallan om Pihkura talu. Ku kiäki nakkas väega uur'ma, et kon tuu õks oll' ja kon tuu õks oll', sis nall'aga poolõs vastatas: «Sääl Pihkura pääl, kon totuga petäi kasvi ja paklanõ pini hauk' nöörädse keti otsan!» Mi võimi taad võtta ku kotussõnimme. Õkva säänest seletävät ja lausõ muudu, nigu nuu kolm maailma kõgõ pikembäs peetüt.
Pihkura pikän nimen om 69 tähte. Nii et maailma pikkusõlt kolmas kotussõnimi om Võrumaal! Turismitegijä, kasutagõ tuud är!
Fastrõ Mariko | | |
|
|
| | Kae, miä ütel´!
Ku kiilt õnnõ kõnõlda ja mitte kirota, om ütel pääväl nii, et kiilt mõist viil mõnikümmend vanainemist.
Võro Instituudi direktri Eichenbaumi Külli võro keelen kirotamisõst (VT)
| |
| | |
|
|
