| Pääleht |
Uudissõ |
Märgotus |
Elo |
| Loe Uma Lehe pdf-i: | | | | | | | | Tahassi saia Uma Lehe pdf-i egä kõrd hindä meili pääle?
Andkõ teedä info@umaleht.ee pääle!
|
| |
|
|
Võrokõnõ olla om uhkõ ja hää | | Harju Ülle
Võrokõnõ olla om uhkõ ja hää – seo mõttõviis ühendäs Hindätiidmise avvohinna saajit. Preemiä saiva Mamastõ latsiaia ja kooli keelepesä ja kooli võro keele ja kultuuri oppaja Lepassoni Marju, Orava kuul ja Võromaa spordiliit.
Vana-Võromaa maavalitsusõ ja Võro instituut kiti preemiäsaajit imäkeelepääväl (14.03.) Mamastõ latsiaia ja kooli aulan.
«Üle-eestiliidsil suvõmängel tahtsõmi näüdätä, et uma Võromaa iist om vaia saista ja teimi hammõ kiräga «Seo rõnna seen lüü võro süä,»» põhjõnd’ uma keele julgõt pruukmist üts avvohinna saaja, Võromaa spordiliidu päälik Õuna Merike. «Seo hamõ jääs egäl puul häste silmä ja Facebookin lüü kah võrokiilne jutt inemisele kõgõ inne ette.»
Tõsõ avvohinnasaaja kandva huult tuu iist, et väikokõsõ latsõ iks umakandi kiilt mõistnu.
Neli Hindätiidmise avvohinna saajat valiti vällä kuvvõ kandidaadi siäst.
Hindätiidmise avvohinda om vällä antu 2012. aastagast pääle. Tuuga kitetäs nii pikkä aigu tettüt tüüd võro keele ja meele hääs ku ka vahtsit ettevõtmiisi. Edespite om plaan avvohind vällä anda egä katõ aasta takast. | | | Ku häste lätt, sis lüü võro süä rõnna seen kipõmbalt: Sokmani Liisi (kural), Vasiljeva Kaiti ja Palo Monika Võromaa korvpallinaiskunnast 14. Eestimaa suvõmängõ (12.07.2015 Kuressaarõn) hõpõmedäliga.
Leola Külli pilt | | Hindätiidmise avvohinna saaja:
Mamastõ latsiaia ja kooli keelepesä
Vanderselle rühmäst sai keelepesä 2012. aastaga sügüse. Egä riidi nä opva ja toimõndasõ õnnõ võro keelen. Latsiaia pidol om näil iks võrokiilne kava. Rühmän omma võrokeelidse sildi, raamadu ja kodopaiga nukakõnõ. Oppaja omma Ehasalu Helle, Verevä Kerli ja oppaja abi Sabbali Karmen.
Mamastõ latsiaia ja kooli kavvanõ helksä võro keele ja kultuuri oppaja Lepassoni Marju
om opanu võro kiilt ja kultuuri 13 aastakka nii võro keele tsõõrin ku valikainõna II ja IV klassin. Kooli jõulu- ja keväjäkontsõrdõl esinese Marju opilasõ kõgõ võro keelen ja omma kittä saanu ka võrokiilsil võistluisil. Tä om olnu oppaja mitmõn Põlva talorahvamuusõumi kõrraldõdun võro keele laagrin.
Orava kuul
Om ainumanõ Vana-Võromaa kuul, kon kõik opilasõ 1.–9. klassini opva võro kiilt, oppasõ Glaseri Maaja, Ilvese Marje ja Kaldmäe Maarika. Võro keele nädälil omma pia kõik koolitunni võrokiilse. Glaseri Maaja iistvõtmisõl om võro keelen üles astut maakunna latsiaidu juhtõ nõvvopääväst nikagu Põlva maakunna aasta imä tenoüritüseni. Sügüse alost’ kooli latsiaia jaon tüüd keelepesä. Orava kooli iistvõtmisõl naati valla aolehen avaldama latsi lustlikkõ võrokiilsit kirätöid.
Võromaa spordiliit
Võromaa spordiliit pruuk umma kiilt Mol’ovihun (Facebook), näide massin kand võrokiilsit kirju, hammidõ pääl lövvüs umakeelitsit ütelüisi, näütüses «Seo rõnna seen lüü võro süä». Võrokiilne kiri om sakõst ka spordiliidu medälide, vimplide, avvukirju jm atribuutika pääl. Võromaa spordiliit kand huult tuu iist, et egän Võromaa nukan olõssi uma spordivõistlusõ, miä avitasõ spordisõbrul umast kodukandist inämb teedä ja luku pitä. |
|
|
|