| Pääleht |
Uudissõ |
Märgotus |
Elo |
| |
|
|
Inne märgi, sis nakka lahkma | | Hummõn (09.12) otsustas Põlva vallavolikogo, kas Põlvahe jääs üts põhikuul ja riigigümnaasium ja Mammastõ latsiaid-algkoolist jääs perrä õnnõ latsiaid | | Mu neli last ja ma esi olõmi kamba pääle läbi käünü kõik Põlva kooli. Hinda Mammastõ kuuli tuuperäst, et sääl opatas Hää Algusõ põhimõttidõ perrä. Oppaja viitsvä tsipa inämb latsiga ette võtta, ku koolitunnõh om ette nättü.
Kuul om kõgõ otsnu, kuis latsõst kasvata julgõt ja ettevõtjat inemist, uma arvamisõ välläütlejät. Inemist, kes lihtsäle ei lõuga, a inne mõtlõs, midä tä taht, ja küsüs. Mõnõlõ om tuu probleemis – esi mõtlõminõ kõigilõ ei miildü.
Ega harilik Põlva põhikooliharidus kah halv ei olõ. A ku vähägi võimalik, võinu latsõvanõmb saia valli Hää Algusõ ja hariligu haridusõ vaihõl.
Kooli oppaja ja tõsõ tüütäjä pandva paika kooli vaimsusõ. Ku lüvvä mitmõ kooli inemise segi, ei tiiä, mis tast vällä tulõ.
Vallavalitsus esi ütles, et valda om rassõ katõst majast juhti, et piät üteh majah olõma, a põhikooli tahtva nä kolmõ majja panda. Ku häste koolijuht kolmõ esi maja juhtmisõga toimõ tulõ?
Vald ei olõ vällä ütelnü ega kirja pandnu, määne Põlva haridus pidänü olõma. Volikogo eelnõu autori omma vallasekretär ja jurist. Küssemi näide käest haridusõ sisu kotsilõ. Vastus oll’, et vahtsõnõ direktri tulõ ja nakkas tegemä.
No ma ei olõ nõuh, et üts inemine nakkas otsustama, määnest haridust Põlvah andma naatas. Mu meelest pidänü juhilõ hoobis kundikava ette kirotama, määnest haridust Põlvah tahetas.
Ku kimmüst ei olõ, sis tuu hiidütäs Põlva kandist kavvõmbahe noorõ perre, kes tahtva ummilõ latsilõ hääd haridust.
Selle omgi Mammastõ kooli hoolõkogo kirotanu vallavolikogolõ eelnõu kottalõ, määne haridus pidänü Põlvah olõma.
Hoolõkogo meelest võissi alalõ jättä nelä klassiga Mammastõ latsiaid-algkooli. Kuvvõklassilidsõst neläklassilidsõs tegemine om eski mõistlik. Viiendäst klassist tulõva valikainõ: ku rohkõmb latsi kuun, saa rohkõmb mitmõsugutsit valikainit pakku.
Ku kats tõist Põlva põhikuuli omma kokko är pantu, sis või märgota, kas panda rohkõmb kokko vai mitte. | |
| | Plakso Ülo,
Mammastõ latsiaid-
algkooli 2. ja 4. klassi
latsõ esä, kooli
hoolõkogo esimiis | |
|
|
|