|
|
| Lasva maanaisi selts 1939. aastal annõtõt lipu pühitsemise pidol. Edimädsen rian keskel (lillilidse kleidiga) kodomajandusõ nõvvoandja Kivi Linda.
Võromaa muusõumi pilt | | | | Tütrikust kasus talopernaanõ… | | | Vanal aol es päse maanaanõ välläpoolõ umma kodoküllä ega kavvõmbahe kodokihlkunna kerkot. A sõs naas’ elo pernaasõ käest rohkõmb tiidmiisi nõudma, ku koton imä käest oppi sai.
1927. aastal tull’ Tarto liina kokko ligi paarsada maanaist, tuust sai algusõ maanaisi seltse ja ütisüisi luuminõ.
Võromaal tetti edimädse naisiseldsi Misson ja Vaabinan. 1933. aastal kõrraldõdi Antsla kodomajanduskoolin üleriigilidse maanaisi suvõpäävä.
1938. aasta lõpus oll’ Võromaal joba 35 maa- ja pernaisi seltsi. Noidõ kaudu kõrraldõdi pernaisilõ kodo ilosas tegemise oppuisi, esieränis panti tähele küüke ja kemmergide kõrda.
Tüüle panti laulukoori, näütlemis- ja käsitüütsõõri, peeti kõnnõ-, tüü- ja pidoõdagit. Päätähtsä oll’ tuu, et noorõ niisama es videlnü.
1935. aastal luudi Lasva maanaisi selts. 16. hainakuul 1939. aastal pühitsedi sisse näile annõtõt lipp. Lipu pühitsemisel Kütioron pidi kõnnõ Lasva maanaisi seldsi edenaanõ Meltsi Erika.
Ruusmaa Arthur,
Võromaa muusõumi päävarahoitja |
|
|
|
Pääleht
