| |  Pääleht |
| Uudissõ |
| Märgotus |
| Elo |
| | |
|
|
| Otsari Lauli müü tükün uma vana rõiva maaha.
Tammiku Lea pilt | | | | Otsari Lauli tõi tiatrihe vanaimä tarõpäälidse | | | Harju Ülle
Võromaalt peri nuur näütlejä Otsari Lauli (23) näüdäs’ minevä nädäli edimäst kõrda lava pääl umaloomingut: EMTA lavakunstikooli 27. linnu tükün «Kassett».
Kolmõst lühküst lavastusõst kokko säetüt tükkü sai nätä pääliina kultuuriklubin Kelm. Kats lavastust olli absurdi-mekiga, a Lauli ja timä kursusõkaaslasõ Kuntu Estri tükk «Osta eelevant är» oll’ tävveste elolinõ.
Lugu om tuust, kuis kats näiokõist läävä kirbuturu pääle ummi asjo müümä. «Näide elon om õkva sääne suur üleelämine olnu, mille pääle nä tahtva ummist vannost asjost valla saia,» selet’ Lauli.
Näüdsiku jutustasõ tükün hindä elon juhtunuist as’ost. «Nuu jutu lätsi päältkaejilõ hinge,» ütel’ Lauli. «Mitu inemist ütli päält etendüst, et läävä kah kodo ja kaesõ uma kapi üle – näil tull’ kah suuv ummist vannost as’ost valla saia.»
Lauli kõnõlõs tükün ka uma vanaimä Silgu Liivi (timäst oll’ lugu 17.09.2013 Uman Lehen) tarõpäälidsest, mille vanaimä om vanno asjo täüs kor’anu.
Lõuna-Eesti rahvas saa Laulit lava pääl nätä sügüse Tarton tükün «Ekke Moor» ja lavakõnnõ-kavan. Tuud perämäst soovitas Lauli kaia nuuril inemiisil.
Lauli ütel’, et om rahul lavakan opmisõga ja uut joba vahtsõt keväjät: kuul saa sis läbi ja peris tiatrielo lätt vallalõ.
EMTA lavakunstikooli 27. linnu tükü omma ka Shakespeare’i «Torm» ja Dostojevskist härgütüst saanu «Idioot FM». Kursusõ juhendaja omma Raudsepä Piitre ja Undi Katariina. |
|
|
|
