| |  Pääleht |
| Uudissõ |
| Märgotus |
| Elo |
| | |
|
|
| Tootsi Johann-Kristjan ja Vodi Mirjam.
Harju Ülle pilt | | | | Rekord-võistlus Adsoni Arturi avvus | | | Harju Ülle
Jüripäävä loiva latsõ Sännän joba 16. kõrda kirämehe Adsoni Arturi avvus võrokeelist luulõt, ülesastjit oll’ rekordarv – 56 last 38 luuga.
Latsõ tulli viiest Vana-Võromaa latsiaiast ja 11 koolist. Võistlusõ üts kõrraldaja Allasõ Tiia ütel’, et seokõrd trehväs’ nii, et mitte üttegi kirätükkü es loeta mitu kõrda. Adsoni luulõtuisi loeti ütessä.
«Kunagi varrampa olõ-i olnu Adsoni-võistlusõl nii pall’o latsiaia-iäliidsi latsi (14) ega juhendajidõ hulgan ni pall’o latsi immi,» tõi tä vällä viil mõnõ rekordi.
Haani kuul oll’ seokõrd kõgõ parõmb katõn vannusõrühmän. 9. klassi opilasõ Tootsi Johann-Kristjan ja Vodi Mirjam võidi Tuulingu Ennu luuga «Vana sann» – nuurmiis lugi ja tütärlats mänge kannõld.
«Tull’ sääne mõtõ, et kuna Haanimaa rahvas alost’ tuud, et savvusann saanu UNESCO nimekirja, sis pruugi taa är,» selet’ Haani kooli oppaja Leidi Kersti luu vällävalimist.
Süämepõh’ast lugõmisõga hindamiskogo süäme võitnu Johann-Kristjan ütel’, et tälle miildüs väega savvusannan kävvü, kukki peris uman koton tuud inämb ei olõ.
Mirjam käü savvusannan vanavanõmbidõ man. «Sannan käümine tuu õkva sändse perimüstundõ pääle: hindat kombit, mis mi kultuurin omma olnu,» ütel’ tä.
Mirjam käve Adsoni-võistlusõl tõist, Kristjan viiendät kõrda ja oppaja Kersti es mõista ummi kõrdu kokko rehkendä.
«Keväjä läävä vanõmba latsõ koolist är, a häid lugõjit tulõ pääle,» ütel’ Kersti, mõtõldõn Lüüsi Kristjanit, kiä võitsõ uman vannusõrühmän.
Seol Adsoni-võistlusõl jäivä silmä mitmõ umaperädse etteastmisõ, näütüses Vahtsõliina gümnaasiumi 6. klassi räpp Contra «Mõttõjõud» perrä.
Mõtõ tull’ jäl oppajal, Sarapuu Heljul. «Kaimi Youtube’ist räppärit, nigunii piät terve seo klass üte luulõtusõ räppin ette kandma.»
Et Contra om latsi üts lemmikluulõtaja, sis es olõ luku rassõ valli. Vahtsõliina latsõ omma käünü Adsoni-võistlusõl 1. klassist pääle. A edimädse latsõ, kellega Helju võistlõman om käünü, omma joba ülikooligi är lõpõtanu. Adsoni-võistlusõ kõrraldamist tugi kultuurkapitali Põlva ja Võro ekspertgrupp, Rõugõ vald ja tõsõ hää avitaja. | | | | Kõgõ noorõmba võitja: Plaado Maritte Arianne ja Mendriku Mairo.
Harju Ülle pilt | | | Kõgõ parõmba lugõja
Latsiaialatsõ – 1. klass
Mendriku Mairo,
Plaado Maritte Arianne
Veriora latsiaid,
juhend’ Plaado Mari
2.–4. klass
Lüüsi Kristjan
Haani kooli 4. klass,
juhend’ Leidi Kersti
5.–9. klass
Tootsi Johann-Kristjan,
Vodi Mirjam
Haani kooli 9. klass,
juhend’ Leidi Kersti | | | | Vahtsõliina gümnaasiumi 6. klassi räppari kandsõ ette Contra luu «Mõttõjõud».
Harju Ülle pilt |
|
|
|
