| |  Pääleht |
| Uudissõ |
| Märgotus |
| Elo |
| | |
|
|
| | Harju Ülle,
päätoimõndaja | | | | |
| Juhtkiri: Pää pistü, maainemine! | | | Päiv paistus ja kevväi piässi süämen olõma, no maainemise läävä seolõ keväjäle vasta küländ murrõn näoga. Kuis tuu elo nakkas no minemä, ku kütüsseaktsiis nõsõs ja vahtsõs maaeloministris om saanu elopõlinõ liinavurle?
No maainemine tiid joba ammu, et kellegi tõsõ pääle olõ-i mõtõt luutma jäiä – maal jääs ello tuu, kiä esi uma eloga toimõ tulõ.
Parhilla käü kõva maalõ elämä tulõmisõ kampaania, a nigu joba hoiat’ Maalehen Harglõ kihlkunna võrokõnõ Raudsepä Kalev: ku liinan toimõ ei tulõ, olõ-i mõtõt maalõ kolli, selle et sääl lätt toimõtulõmisõs viil inämb ettevõtlikkust vaia.
Joba omgi nii, et maainemine om tuu kõgõ tegüsämb ja ettevõtlikumb inemine. Olõ-i midägi imehtä, et Eesti kõgõ parõmb teenindäjä olõ-i pääliinast, a hoobis Räpinält.
Säältsamast Räpinält, aianduskoolist, tulõva ka erialakonkurssõ võitja ja vahtsõ värski mõttõ: näütüses üle-eestiline tomadi kasvatamisõ kampaania.
Aianduskuul haard kinni ka värskist tegüsist ettevõtmiisist nigu Opipoisi-oppus, minkast seon Uman Lehen juttu om. Ildaaigu kirotimi Eesti kõgõ kipõmba käübe kasumisõga Orava kandi ettevõttõst ja noid kõgõ-kõgõ tegemiisi om mi kandin viil hulga.
Vana-Võromaa om iks tuu kõgõ-kõgõ maa. Eesti kõgõ korgõmb mägi Munamägi, kõgõ pikemb jõgi Võhandu ja kõgõ vanõmb puu Tammõ-Lauri tamm omma meil nigunii.
No eläs ka Eesti kõgõ vanõmb inemine mi kandin: riidi 108. sünnüpäivä pidänü Räpinä naanõ Mälbergi Elle. Pall’o õnnõ Ellele ja ilosat keväjät kõigilõ! |
|
|
|
