| |  Pääleht |
| Uudissõ |
| Märgotus |
| Elo |
| | |
|
|
| Kiisa Tiia.
Harju Ülle pilt | | | | Aasta kaitsõliitlanõ om võrokõnõ Kiisa Tiia | | | Harju Ülle
Kaitsõliit valisi 2014. aasta kaitsõliitlasõs Varstust peri, Lüllemäe juuriga Kiisa Tiia (47). Edimäst kõrda om sääne avvunimi antu naistõrahvalõ.
Minevä aasta Kaitsõliidu hääs 182 päivä priitahtlikku tüüd tennü Tiia om vidänü Võromaa malõva nuuri tegemiisi ja spordivõistluisi. Tä mõtõl’ vällä ja kõrrald’ võrokiilse nimega patrullvõistlust «Käve üle küngastõ».
Tiia tunnistas, et timä kõrraldõdu võistlusõ omma olnu jah rassõmba, ku tõisi kõrraldõdu võistlusõ (tuud kõnõliva timä kolleegi). Tiia esi om kah kõva võistlõja: om võistõlnu Erna retkel ja Utria dessandil. «Olõ sääne vindsõ naanõ,» seletäs tä tuud, et om võistluisil pallodõst miihist kõvõmb.
«Latsõ (kolm tütärd – UL) omma suurõ ja miist ei olõ,» põhjõndas Tiia tuud, kuis tä om nii pall’o aigu saanu Kaitsõliidu hääs pühendä.
Tä oll’ hinnäst kirja pandnu ka admiral Pitka luurõvõistlusõ võistkunda, a no ütel’ tuust är.
«No ma tunnõ Võrumaad niipall’u häste, et tuu es olnu peris aus,» ütles tä üte põhjusõ. A tõnõ põhjus om tuu, et joba kats nädälit om Tiia vahtsõ tüükotussõ pääl.
Et Kaitsõliidu valvjakotus kattõ är, sis läts’ Tiia tüüle Paldiskilõ Scoutspataljoni – staabi tagala kompanii medrühmä. Et täl meditsiiniharidust olõ-i sis saadõti tä seost nädälist 2,5 kuus vahipataljoni mano opma.
Väiku pisar tüküs Tiialõ iks silmä, et tä piät ummist armsist Võromaa inemiisist kavvõl olõma. «Kuun kõrra-kats iks tulõ nuuriga tegelemä,» märk tä ja arvas, et Sännä retk ja «Käve üle küngastõ» läävä vast ilma timäldä iks edesi.
Tiia kitt tegosit Võromaa nuuri, kiä võistluisil vapralt vasta pidävä. A hää sõna saava ka vana: «Mul om olnu paar 70aastast abilist ja nä omma väega tegosa ja kohusõtundliku!» |
|
|
|
