| Pääleht |
Uudissõ |
Jutuvõistlus |
Elo |
| |
|
|
Salmivõistlus tõi vihutävve salmõ | | Võro instituudi salmivõistlusõlõ saat’ uma värsi 13 inemist.Võistlusõl oll’ neli teemat: hällüpääväsalmi, salmi latsõ sündümise puhul, leinäsalmi ja salmi millegi härgütämises.
Kõgõ inämb saadõti salmõ, millega hällülast meelen pitä vai midä om hää pruuki latsõ sünnü puhul.
Härgütüisi pruuvsõ tetä üts värsimeistri.
Salmõ hinnas’ hindajidõ kogo, kon olli Uma Pido projektijuht Ojari Triinu, luulõtaja Rahmani Jan, Kaasiku Mairi Eesti rahvaluulõ arhiivist ja salmivõistlusõ iistvõtja Kabuna Kaile.
Hällüpääväsalmõst sai kõgõ inämb punktõ Kindma Maimu lihtsä sõnnom:
Paistku sullõ pääväkene,
toogu tervüst tuulõkõnõ,
pall’u õnnõ, sõbrakõnõ!
Leinäsalmõst paistu kõgõ mõosamba Laanekivi Õie ria:
Velekene, tsipa tõrukõnõ
tahtsõ kassu suurõs puus.
Tormituul tä ärä murdsõ
keset elokeväjät.
Vahtsõt ilmakodanikku om hindajidõ meelest illos tervütä Panga Milvi salmiga:
Üskä-hällü oodõtulõ
üten andas naarunälg.
Pia tä teid jo põsõst purõ,
katõst hambast jären jälg.
Võistlusõlõ saadõti värsse ka mõnõl muul teemal, ku vällä hõigat oll’.
Hindaja nõsti noidõ siäst vällä Plumanni Kaja-Riina parhilla pääväkõrralidsõ salmi:
Teil soovi kallist jõulurahhu
ja tuu, mis tarrõ är ei mahu,
puistata võis üle maa,
et maailm parõmbas meil saas.
Niisamatõ paistu võistlusõl silmä Mamastõ latsiaia-kooli oppaja Mägi Marisõ luudu salmi, midä passis pruuki latsõ hällüpääväl, kuuliminegi puhul ja lihtsäle latsiga üten lauldõn.
Kiä taht Umma Lehte õnnõsoovi- vai muud kuulutust panda, saa seod värsivarra no pruuki. Salmõ saa kaia Võro instituudi kodolehe www.wi.ee päält.
Kabuna Kaile |
|
|
|