| |  Pääleht |
| Uudissõ |
| Märgotus |
| Elo |
| | |
|
|
| Uma Pido sääd lava pääle Põlvast peri näütlejä ja lavastaja Tootsi Kristo | | | Harju Ülle
Neländä Uma Pido lavastajas valiti Põlvast peri vabakutsõlinõ näütlejä ja lavastaja Tootsi Kristo (37).
«Taha tetä midägi sääl, kost ma peri olõ, ja Uma Pido seokõrdnõ teema – mõts ja väelise puu – kõnõlõs mukka isikligult,» põhjõnd’ Tootsi Kristo suuvi Umma Pito lavasta.
Tä sai mõttõ mõtsateemalidsõ pido lavastamisõs Meri Lennarti raamatust «Hõbevalge».
«Sääl om juttu kuusõ all elämisest ja kuis kuusõpuu om nigu sammas, mis hoit pistü taivast mi kotsil, om köüdüs mi ja taiva vaihõl,» kõnõl’ Kristo mõttõst, mille ümbre tä taht pido kokko säädi.
Tootsi Kristo valiti nelä kandidaadi siäst vällä selle, et tä mõist mi kiilt ja tund umma kodokanti. Tä haard tiatritegemiste üten latsi ja nuuri, kelle pääle Uma Pido pall’o mõtlõs.
Kristo eläs perrega Tarton, a käü sakõst Põlvan vanõmbil külän. Põlvan eletüst aost mälehtäs Kristo uhkusõga, et tull’ Põlva Serviti võistkunnan kolm kõrda Eesti käsipallimeistris.
«Kõik kandidaadi paki vällä põnõva tii, midä pite Uma Pido seokõrd minnä võissi. Mul om hää miil, et saami komisjoni otsussõl astu taad tiid üten Põlvast peri lavastajaga,» ütel’ valimiskommisjonin olnu Põvvati Helje Põlva maavalitsusõst. | | | | Tootsi Kristo.
Toometi Merikese pilt |
|
|
|
