| |  Pääleht |
| Uudissõ |
| Märgotus |
| Elo |
| | |
|
|
| | Harju Ülle,
päätoimõndaja | | | | |
| Juhtkiri: Rahvas piät saama esi otsusta | | | Olõ ütte miilt tuntuisi võrokõisiga, et Võromaa rahvas piät saama umalõ riigigümnaasiumilõ esi nimme valli. Võro liinavalitsus või jo esi kimmäs olla, määne nimi rahvahääletüse võit, a tohe-i võtta inemiisilt võimalust umma hellü anda ka mändselegi tõsõlõ nimele.
Liinavalitsus olõssi sis jo võinu uma komisjoniga nuka takan är otsusta, et vahtsõlõ riigigümnaasiumilõ võetas vana Kreutzwaldi nimi. Mille sis oll’ vaia ülepää rahvahääletüst kõrralda?
Ku joba rahvahääletüs tetti, olnu ausa kõik konkursilõ pakutu nime rahvalõ vällä pakku. Sis olõssi saanu üte vai tõsõ nime suuvja meediän põhjõnda, kuimuudu tuu nimi vahtsõlõ koolilõ elo ja hinge and. Kuimuudu saanu nime vägi vällälubatut ummamuudu ja hää haridusõ andmist takast tougada.
Et taad jamma tsipakõsõgi klaari, om üts soovitus.
Hää võrokõsõ, ku ti olõti tsensuuri vasta ja ti jaos om tähtsä, et Võro riigigümnaasiumi nimi valitasi demokraatligult, minke kimmähe www.voru.ee kodolehe pääle koolinimme hääletämä (NB! Hellü saa anda seo kuu lõpuni).
Andkõ uma helü nimepaarilõ Võru gümnaasium-Võru põhikool. Esiki sis, ku ti meelest olõ-i ka Kreutzwaldi nimel suurt hätä. Võro liinapää lubasi, et päält konkursi lõppu tetäs ka tõsõ nime avaligus. Sis saa iks naada rahvaga arotama, määne nimi koolilõ kõgõ parõmb om ja tuu nime ildampa Võro ja gümnaasiumi vaihõlõ kirota. |
|
|
|
