| Latsõ mõistsõ lihamassinat kipõmbalõ kokko säädi.
Antsovi Raivo pilt. | | Savõrna laat es mahu platsi pääle är | | 28. süküskuu pääväl Savõrnan peetü mihklilaada pääle tull´ kokko nii hulga kauplõjit, et laadaplats jäi kitsas.
Müügis oll’ tuudu mett, lambalihha, sõira, kalla, kodoveini, küdsetüt kraami, sibulat, kurõmarju ja palokit, linaõlli ja -jahhu, purgisüüke, massinajuppõ ja pall’o muud.
Pall’o kaeti kodojänessit.
Viktoriinis oll’ vana ao majapidämisriistu ärtundminõ, tuuga sai rahvas parajalõ pääd murda. Niisama oll’ peris rassõ õnnõ maigu ja lõhna perrä vürtse ja hainu är tunda.
Populaarnõ oll’ lihamassina ao pääle kokkopandminõ. Tull’ vällä, et latsõ olli kipõmba ja osavamba kokkopandja.
Laada pääl oll’ ka purgisüüke võistlus: võistli 13 salatit ja kuus sahvti. Laadaliisilõ miildü soolatsist purgisüükest kõgõ inämb Peetsmani Heli seeneseljanka ja makõst kraamist Meitsari Svetlana pääväminegi sahvt rabarbrist, põrknast ja aprikoosist.
Laada man peeti viil vanakraamiturgu, päämidselt pakuti rõivit, majapidämiskraami ja autojuppõ.
Luiga Anu, Valgjärve valla kultuuritüütäjä, laada kõrraldaja |
|