 Pääleht |
| Uudissõ |
| Märgotus |
| Elo |
| | |
|
|
| 1940. aastagal lavatandsu opnu Plaani naasõ.
Võromaa muusõumi pilt | | | | Plaani külä tandsuoppus | | | Haanimaa rahvas om joba vanast aost laulu- ja tandsusõbõr. Ütski talguõdak lää-s müüdä laululda, simmani omma kõgõ väega moodun olnu.
Inne tõist ilmasõta sai tandsminõ Haanimaal esieränis suurõ huu sisse.
Pidol taheti nätä iks muudsampi tandsõ. Selle kõrraldõdi Plaanil 1935. aasta 12. piimäkuu pääväl muudsa tandsu oppus. Huviliidsi tull’ kokko 35.
Tandsuoppaja tuudi paiga pääle Võro liinast. Tuu mängse esi akordionni kah.
Muudsa tandsu olli fokstrott ja tango, valss ja aiglanõ vai Inglüse valss, a opiti ka ballitandsõ. Taheti iks liinasaksuga sama pulga pääle jõuda.
Umma tandsumuusikat tekk’ Puspuri külä orkõstri ja Haani rahvamaja orkõstri Elmo-Band, midä juhtsõ Marani Elmar.
A rahval es olõ iks viil küländ. Nii kõrrald’ Plaani-Haani laulu- ja muusigaselts Helin lavatandsukursusõ. Otsa Richard kõrrald’, kokko tull’ 33 huvilist. Sama õdagu tetti Tammõmäel tandsupido üten tandsuetendüsega «Viini valss».
Pildi pääl omma lavatandsja-naasõ (kuralt) Keldri Armilda, Hariku (Taldriku) Linda, Kivestu Maie ja Meemanni Luise. Tõsõn rian (kuralt) Otsa Antonina, Hariku (Trooveri) Lonni, Savi Aino ja Dessa.
Pildi taadõ om kirotõt 16. juunil 1940. Eesti Vabariigi edimäst aigu jakku viil nädälis aos.
Tandsu-laulutegemise saiva Haanimaal vahtsõ huu sisse 1988. aastal, ku Haani rahvamaja mano tetti segärahvatandsurühm. 1994. aastast om seo nimi Haanja Tantsu Mängu Laulu Selts. Kraami Sulõv võtt iist ja jakkas Helina tegemiisi.
Ruusmaa Arthur, Võromaa muusõumi päävarahoitja |
|
|
|
