| |  Pääleht |
| Uudissõ |
| Märgotus |
| Elo |
| | |
|
|
| Kummirõividõ ja gaasimaskõga viimatkaja.
Palmre Aivari pilt/Võromaa muusõumi pilt | | | | Heränemine luuduskaitsõkuul | | | Parhilla om luuduskaitsõkuu. Tuu om olnu tähtsä egä riigikõrra aigu. 26 aastakka tagasi 8. lehekuu pääväl kõrraldi Võromaa rohilidsõ mõttõviiega inemise ummamuudu viisõidu Koreli ujja pite.
1988. aasta oll’ aastak, ku muinsus- ja luuduskaitsja, rahvarindeläse ja Võro Sõltumalda Nuurikolonn nr 1 ummi tegemiisiga silmä jäivä.
Tuus ummamuudu viisõidus panni rohilidsõ sälgä kummirõiva ja päähä gaasimaski.
Sõs naati mitumõsuguidsi loodsikidõga Koreli ujja pite sõitma. Ettevõtmisõ mõtõ oll’ tuu, et murõ är tsolgidu Koreli uja peräst suurõmbalt rahva miilde tuvva.
Paadisõitja kutsõva kuulutuisiga partsõ puhtas tegemä.
Üte plakadi pääl om nätä kiri «Juust Moskvalõ, sitt Võromaalõ!» – murõ Nõvvokogo Liidu rüüvli-majandusõ peräst.
Seo umaperäne protestimatk mõot’ mi inemiisi arvamist umast luudusõst ja elokeskkunnast.
Seo om ka ummamuudu alostala sändsile rahvaüritüisile nigu omma parhilla Võhandu maraton, Rõugõ paadiralli ja kodokandi puhtastegemise talos «Teemi är!».
Ruusmaa Arthur, Võromaa muusõumi päävarahoitja |
|
|
|
