Pääleht |
Uudissõ |
Märgotus |
Elo |
| |
|
|
Katsas küläpillimiihi päiv Oravil | | 15. urbõkuul peeti Oravil katsandat küläpillimiihi päivä.
Kokko tull’ umbõs 70 pillimiist. Kõgõ kavvõmbast tulõja olli Saarõmaalt ja Kihnust. Inämbüs olli lõõdsamehe, a oll’ ka kandlõansambli.
«Seokõrd oll’ üts esinejä väega umanäolinõ pillimiis Saarõmaalt – Annusõ Ain,» kitt’ pido kõrraldaja Pähnä Külli. «Tä om väsümäldä, mäng kõgõst hengest ni saarlasõ umaperä viil mano arvada.»
Kolm kimmäst pillimiist omma egä kõrd küläpillimiihi pääväl mängmäh olnu: Tartese Heino, Lindmetsa Harri ja Ruusamäe Elmar. Kõgõ vanõmba osalisõ olliki Ruusamäe Elmar (80)Võromaalt ja Koppeli Endel (78) Tartomaalt. Kõgõ noorõmb esinejä oll’ Orava uma valla latskõnõ Luigõ Lisbet (13).
Kodominekiga es olõ kellelgi kipõt, pilli helisi varahadsõ hummoguni. «Suur teno kõigilõ pillimiihile ilosa kontsõrdi iist. Aituma pido tugõjilõ!» tennäs’ Pähnä Külli.
Tulõva aasta küläpillimiihi päävä kotsilõ märgot’ Pähnä Külli, et tulõ iks tetä.
Kimmähe tulõ Oravil suvinõ pillimiihi pido. Suvõl väläh om pido hoobis tõõsõ hõnguga ku kultuurimajah, koh jääs ruumi veitüs.
Seo suvi om pillimiihil pall’o ettevõtmiisi: Saarõmaal küläpillimiihi kokkotulõk, Villändimaal lõõdsapäävä, Tal’nah pillipido, Harmoonika Põlvah ja Kikka Karla 100. sünnüaastapäävä tähistämine Valgjärvel.
Säinasti Ene |
|
|
|