Pääleht |
Uudissõ |
Märgotus |
Elo |
| |
|
|
| | Ruitlasõ Olavi,
päältkaeja | | | |
Silma vallalõ! | | Alosta vällävõttõga Etkäri kõnnõst, mille tä pidi Vinne välisministeeriümi diplomaatia akadeemiän. Tä ütel täpsele nii: «Tõnõ ilmasõda kuun kõiki protsesse ni okupatsiooniga ei olõ mõotanu Eesti rahvastikku nii hirmsahe, ku tuud om tennü pikäaignõ hääpoolinõ-liberaalnõ juhtminõ. 20 aasta joosul om Eesti kaotanu suurõ osa umast elänikkunnast.»
Ja tõnõ välläütlemine säältsamast: «Või-olla ti mäletäti, et 1970. aastal plaansõ ka Nikita Sergejevit Hrutov massulda ütistranspordi tetä. A vot meil õnnistu seo mõtõ ello viiä, kuigi 40 aastat läts aigu.»
Ma usu, et no ku Etkäril aoluulinõ iinkujo leütü om, om selge, et tä vii ka ülejäänü Hrutovi plaani ello.
Lähembä mõnõ aasta joosul lätt maisikasvatamisõs. Mi kõik tiiämi terminit «Hrutovi sula». Talnan om ilmselgele joba «Etkäri sula»: kaartõveere tsilgusõ ja om põhjust pelädä, et tuu käügin lätt Hrutovi puult maaha pantu mais lõpus ka kasuma.
Hrutovi kiriväst elost om viil teedä, et 1960. aastal, ku tä käve ÜRO pääassambleen, võtt tä kängä jalast ja pesse tuuga vasta kõnnõpulti.
Ku Etkär Vinne välisministeeriümi diplomaatia akadeemiän kõnõt pidi, jäi täl käng jalga. A ku tä piässi europarlamendi iin kõnnõpukki päsemä, sis ma usu, ei suta tä kiusatusõlõ vasta pitä.
Etkär kirotas Nõvvokogo aost peri maahajäämise tõisi eräkundõ tegemäldäjätmiisi arvõlõ. Et nii hulga inemiisi om vällämaalõ tüüle lännü, tuun om timä sõnno perrä süüdü hääpoolinõ poliitiga.
Tollõ ja kiudutamisõ vaihõlõ võrdusmärgi pandminõ ei olõ timä jaos küsümüs. Umma Talliina, kõgõ suurõmbat maapiirkundõ tühästegijät, tä muidoki ei nimma.
Kommunismi vahtsõnõ Hrutov ehitämä ei nakka, ao omma muutunu. Oligarhõ ja kupõrnaatridõ süstem om tegüsämb.
Parhilla ost Vinnemaa timä kaudu Eestimaad kokko, Keskeräkunna valijidõ kaudu näütüses. Tuuga omma kaudsõn mõttõn Vinne väe ja baasi meil joba otsapiten seen. Oodami parlamendivalimisõ är ja sõs nakkami referendumit uutma? Ma ei tiiä, midä kapo mõtlõs vai uut. Et kuna Etkär maisi kasvatama nakkas vai? Vinne Hrutov lõpõt uma päävä kodoarestin. Mis mi uma Nikitaga teemi? |
|
|
|