 Pääleht |
| Uudissõ |
| Märgotus |
| Elo |
| | |
|
|
| Parõmba võro keele tundja teedä | | | Võro keele ja kultuuri tundmisõ olümpiaadi «Ütski tark ei sata taivast» võitja omma Niido Greete Võro Kreutzwaldi gümnaasiumi (VKG) 11. klassist ja Lõhmusõ Angela Orava põhikooli 8. klassist.
Edimädse kolmõ hulgan olli vanõmban vannusõrühmän viil Variku Inge (VKG) ja Niiluse Rauno (Antsla G). Noorõmbidõ siän sai tõsõ kotussõ Helekivi Keili (Rõugõ PK) ja kolmanda kotussõ Kobini Marianne (VKG).
Olümpiaadilõ kutsuti veebiviktoriinil «Ütski tark ei sata taivast» kõgõ inämb punktõ saanu opilasõ. Olümpiaadilõ tull’ nii 11. ku 8. klassist mõõtu võtma 19 opilast.
Vanõmba vannusõrühmä võitja saa sõita Eesti eurosaadigu Padari Ivari kutsõl Brüsselihe säälset ello kaema.
Võistlusõ pääteema oll’ seo aasta Urvastõ kihlkund. Tull’ teedä kihlkunna kuulsambit kotussit ja inemiisi. Pääle tuu tull’ võrokeelitsist sõnnost ja ütelüisist arvo saia ja võrokeelidse luulõ man kah märgota.
Küsti ka arvamist, midä piässi tegemä, et võro kiil alalõ jäässi. Säält tull’ vällä iks tuu lihtsä tõtõ: kiilt tulõ kõnõlda ja koolin opada, sis om püsümäjäämine kah kimmäs.
Viktoriini «Ütski tark ei sata taivast» kõrraldas Võro instituut 2001. ja võro keele olümpiaati 2008. aastast. |
|
|
|
