| Pääleht |
Uudissõ |
Elo |
Märgotus |
|
|
|
| | | | Muusõumitüütäjä Kengi Pauline hoit vaalikurikut – Võromaa muusõumi 35 000. asja. Rõõmsa muusõumidirektri Krulli Aleksandri iin om tähtpäävätort.
Hollo Aimi pilt. | | | |
Auväärne 35 000. muusõumiasi | |
Täämbädses om Võromaa muusõumilõ hoitmisõs antu kokko 56768 vanna asja. A üts ummamuudu tähtpäiv oll’ 1989. aastal: 17. märdikuu pääväl tuudi muusõummi 35 000. asi – vaalikurik.
Tuu tsõõrik tähtpäiv sai ka pildi pääle võetus: muusõumi tüütäjä Kengi Pauline hoit käen vaalikurikut.
Tuu om kimmäs mõsu silestämise kurik, miä oll’ harilikult puul miitret kooni miitre pikk.
Kurigu alomanõ puul oll’ ristipite tsärbäline (pildi pääl nätä), päälepoolõ tetti noilõ ilostusõs kas lõikõ- vai palotamisjäle.
Mi muusõummi tuud vaalikurigu päälne om sile ja toolõ om sisse lõigat aastaarv 1901 ja pleiätsiga kirotõt «Ojamaa».
Vanastõ trulliti sändse vaalikurikuga mõssu, miä oll’ ümärigu vaalikaika ümbre kääntü. Mi muuseumin om ka üts vaalikaigas, miä seo vaalikurikuga komplekti käü.
Võromaa muusõumi 35 000. asi om elänü mi majan väega tegüsät ello: om mi näütüisil iks välän olnu ja tuud om kõvastõ pruugitu ka koolitunnõ man.
Rehkendi, et ku muusõumikogo tävvendämine lätt saman tempon edesi (umbõs 500 asja aastan), sis lätt viil umbõs 26 aastat, ku saa täüs kats kõrda tsõõrikumb arv ehk muusõummi jõud 70 000. vana asi.
Ruusmaa Arthur,
Võromaa muusõumi päävarahoitja
| | |
|
|
|