| |  Pääleht |
| Uudissõ |
| Elo |
| Märgotus |
|
|
|
| | | Piimäpukilugu tekk’ vanast mehest jäl poiskõsõ | | |
Ku mi naabrimiis viil väikene poisikõnõ oll’, sis käve tä iks suvõl imäga piimäpuki man. Sääl oll’ väega põnnõv külä vannomiihi juttõ kullõlda.
Ütskõrd arotiva Musto Gusta ja Mesi Karla tuud asja, kuis sõa aigu tank Tinapu järve sõitsõ ja nüüt sääl vii põh’an videles.
Sääne jutt es lasõ poiskõsõl mitu üüd rahulikult maada. Kül tä mõtõl’, kuis tuud tanki kätte saia, a imä ütel’, et kullõlgu-i poiskõnõ tuud vannomiihi lorra.
Aasta lätsi, vannomiihi ei olõ inämb seon ilman, piimäpukkõ ei olõ kah paarkümmend aastat ja poiskõsõst om täüsmiis saanu.
A minevä talv tull’ naabrimehel tuu vana lugu miilde.
Tä kutsõ sõbra ka appi ja mehe lätsi ravvaotsjaga järveijä pääle. Nä kõndsõva sammuviisi pia kõgõ järve läbi. Massin tekk’ paar nõrka piuksu kah, a muud ei midägi. No kon tuu tank sõs om?
Nüüt naard’ naabrimiis, et näet, vana piimäpukilugu tekk’ viil hulga aastidõ peräst mehest kõrras poiskõsõ.
Luiga Oliver-Sander Parksepä keskkoolist
| | |
|
|
| | | | | | Uma Lehe välläandmist tugõva Vana Võromaa Kultuuriprogramm ja | | | | | | |
|
|
|
