| Pääleht |
Uudissõ |
Märgotus |
Elo |
|
|
|
| Uma Meki kõgõ umakeelitsemb kauplõja möi tatrikku | |
| | | | Sadramõtsa tatrigukasvataja Harju Heino äri es lää Uma Meki laada pääl häste, a tuu iist sai tä inemiisiga juttu aia | | | |
5. märdikuul peetü Uma Meki suurlaada kõgõ umakeelitsembä kauplõja preemiä sai Rõugõ vallast Sadramõtsast peri tatrigukaupmiis Harju Heino.
«Uman keelen saa asju aia külh!» ütel’ preemiä saanu miis. Tä kitt’ umma kaupa õnnõ kodokandi keelen ja silte pääle oll’ kah esi trüknü «Tatrik», «Tatriku suurma’» jne.
Heino kõnõl’, et peräkõrd läts’ ka suurõmb jago ostjist mi kandi keele pääle üle. «A äri oll’ iks kõhnavõitu, kehvemb ku minevä aasta – rahval ei olõ rahha,» selet’ tä. Mahhelt kasvatõdut tatrikku müü miis päämidselt laatu pääl ja umalõ tutvidõ tsõõrilõ. Tatrigusuurmakilost küsüs tä kats ja jahukilost 1,3 eurot.
Uma Meki kõgõ parõmbas paikligus tuutõs valõ rahvas Jaaniraotu talo Seto salsa (krehvtine mökin liha mano), laadakõrraldaja and’ pääpreemiä Jõõniidü talo Iskna suidsujuustulõ. Kõgõ parõmb vahtsõnõ söögikraam oll’ Kolotsi talo pehme kitsõpiimäjuust ja kõgõ parõmb makõ kraam Alt-Lauri talo kürvidsä-nätsukomm.
Uma Meki laada pääl möi talokraami 80 tuutjat. Laadal käve päält 3000 inemise. Laada kõrrald’ Võromaa Partnõrluskogo.
UL
| |
|
|
| | | Uma Lehe välläandmist tugõva Vana Võromaa Kultuuriprogramm ja | | | | | |
|
|
|