| |  Pääleht |
| Uudissõ |
| Märgotus |
| Elo |
| | |
|
|
| | | Soldanipoissõ võidukat laulupunti vidä võrokõnõ | | | | Peedosaarõ Kaisa | | |
| | | | | | «Laul jätta!» 14.05 Ridalin laulman, Rosina Viljar om õnnõ puudu: täl oll’ tuupäiv kurk haigõ | | | | |
«Laul jätta!» om punt soldanipoissõ, kiä lõõritasõ nigu tsirgu. Timahavatsõl Moisekatsi Elohelü folgipidol pääpreemiä võitnu laulupundi vidäjä om Võro liina poiss, kapral Rosina Viljar (23).
Alostusõs tuust, kuis osa aotiinjit saa niimuudu lõõrita ja tõõsõ omma püssega mõtsan.
Rosina Viljar selet’, et aigu tiinmä läts’ tä pääliina vahipataljonni ja lõpõt’ soldani baaskursusõ nigu õga tõõnõ aotiinjä. Sõaväeline eriala om täl laskja.
Sis «lainati» Viljar kaitsõväe orkõstrilõ lauljas. «Suvõl saa esi kah mõtsan kävvü, ku mõtsahimo nii suur om. A ega pillimiihi elo ka kerge olõ-i. Ku helü näütüses otsan, sis punnitat iks laulda nii, et näost verrev – kae et satat kokko,» kõnõl’ Viljar.
Moisekatsi Elohelü pääpreemiä pandsõ kõik laulupoisi uhkust tundma. «Ku võitja vällä kuulutõdi, sis oll’ hää tunnõ külh. Olõ käünü seol võistlusõl mitmõl aastal, a pääpreemiä sai edimäst kõrda,» ütel’ Viljar.
Kuiki päält Viljari om laulupundin õnnõ üts võrokõnõ viil (kapral Levistu Lauri (21) Põlva kandist, kiä mäng kaitsõväe orkestrin bassi ja om laulupoistele laulu mano lõõtsa mängnü: opsõ tuud aoteenistüsen), es olõ kinkalgi kohustusligu võrokiilse rahvalaulu äropmisõga murõt. «Ku naksimi luku opma, sis pannimi laulu eesti kiilde ümbre. Opmisõ aol pidi ma õnnõ paar kõrda tõisi välläütlemist parandama,» selet’ Viljar.
Ansambli sündümise luu pääle nakas’ Viljar algusõn naardma ja ütel’ sis lühküle: «Käsk oll’ sääne!» Tegeligult om aotiinjide ansambli kaitsõväe orkõstrin joba neli aastakka. A seo om edimäne aasta, ku nii suurõlt käüdäs ilmarahva iin üles astman.
«Aoteenistüs om viil tuuperäst huvitav, et kaitsõväe orkestrihe lähetüste võeti kõgõ suurõmb hulk aotiinjit,» tiidse Viljar. Mehe, kiä säändsehe punti saava, mõistva mitund asja. Laulva ja mängvä pilli kah, kas sis rivitrummi vai puhkpilli. «Laulami estraadist rassõ rokini, luu valimi esi ja oppi avitas kapral /Kaspar/ Mänd,» ütel’ Viljar.
Ansambli nimi «Laul jätta!» tull’ miihil lihtsäle. «Ma ja ansambli üts liigõ, riamiis Kütaru Gert-Heiko, mõtlimi õgasugutsit nimmi algusõn. A sis tull’ hää mõtõ, et panõmi «Laul jätta!».
Seo om käsk. Ku mindäs süümä, sis hariligult lauluga, ja ku vaihõpääl müüdemarsi aol tulõ lippõ pääle kaia, sis antaski sääne käsk,» selet’ Viljar.
Seo kuu, inne aoteenistüse lõppu, oll’ ansambli «Laul jätta!» kontsõrdinimekiri kirriv.
«Mereväeläisile kävemi laulman, koolimajjon, latsiaidun, tõisilõ soldaniilõ ja muidogi imäpäävä kontsõrdi,» ütel’ Viljar. «Edesi lätt õgaüts umma rata: kiä kuuli, kiä tüüle. Olõmi lubanu, et saami iks vahel kokko ja tulõtami vanno aigõ miilde.»
Uma aoteenistüse võtsõ Viljar kokko katõ sõnaga: väega hää. «Sunduslinõ väeteenistüs võissi iks jäiä. Olõ-i seo asi midägi nii hull, ku pelätäs,» ütel’ Viljar naarulidsõlt.
Esi om tä läbi ja lahki muusigainemine. «Pääle aoteenistüst om mul vaia uma muusigakuul är lõpõta,» kõnõl’ tä umist lähembä ao plaanõst.
Viljar tege üten katõn bändin: rokkbändin Analysis ja folkbändin Fibrill.
|
Soldanipoissõ laulupunt «Laul jätta!»
Kapral Viljar Rosin (23), Võro
Kapral Kaspar Mänd (22), Muhu; laulujuhendaja
Kapral Margus Toompere (20), Talliinn
Riamiis Allan Järve (22), Kuusalu
Riamiis Madis Kukk (22), Talliinn
Riamiis Gert-Heiko Kütaru (23), Talliinn
Riamiis Lauri Lehtsaar (23), Tarto
Riamiis Mihkel Pilt (24), Talliinn
| | | | | | |
|
|
| | | | Uma Lehe välläandmist tugõva Vana Võromaa Kultuuriprogramm ja | | | | | | |
| | |
|
|
![](javascript:var newWin=window.open("naita_pilti.php?pilt=img/2385.jpg&h=241&w=173","","toolbar=no,location=no,directories=no,status=no,menubars=no,scrollbars=no,resizable=no,width=173,height=241"))
![](javascript:var newWin=window.open("naita_pilti.php?pilt=img/2387.jpg&h=241&w=462","","toolbar=no,location=no,directories=no,status=no,menubars=no,scrollbars=no,resizable=no,width=462,height=241"))
