Uma Leht om savvusannamälehtüisi är trüknü joba aastak aigu. No om aig sannateemalõ juun ala tõmmada.
Lehte mi sannajuttõ inämb ei panõ, a saata või noid iks: Võro instituut korjas savvusannaperimüst edesi. Lõpõtusõs kolm väikeist savvusannakildakõist.
Suidsusann avitas pia egä hädä kõrral ja tuud või õigusõga nimmada Tervüse Templis.
Parhillatsõl murrõrohkõl aol avitas suidsusann häste murrist valla saia. Esieränis hää om sis, ku kõik omma sannan käünü ja om tahtmist viil kündle palama panda ja rahuligult mõtiskõlla kõgõ üle, mis müüdä lännü. Tulõ sääne pühälik, tasalik, hindäga rahul olõja tunnõ.
Inne sanna minekit ei massas muiduki süvvä ja midägi rassõt tetä, sanna tulõ minnä rahuligu tundõga.
Karastamisõ jaos või juumisõs üten võtta alkoholivaba õllõ vai kõomahla.
Ka lõunõt tulõ rahuligult hiitä, minudilidsõ vaihõga, et kihä saasi harinõda. Sis tunnõt, ku tasaligult lõunõ su manu jõud ja sinnu terves tegemä nakkas. Suidsusann ja tsuklõminõ Pärlijõõn praavitas egän vannusõn inemiisi.
Tiivoja Jaan Rõugõst
Ma olli koski viie aastaga ümbre, ku vanaimä kütt’ nädäli seeh sanna. Mi sannah pidi rohitsõja nakkama õdagu rahval verd laskma.
Ma käve kõik aig vanaimäl takah ja palsi, õt timä minno kah sanna üteh võtasi ja ma saasi nätä, kuis toda verd lastas. Nigunii õs olõ mul määnestki ettekujutust, mis tuu verelaskminõ om. Kuna nan’a ütel’, õt latsõl õi olõ midägi sääl vanno inemiisi toimõndamiisi man tetä, sis olli mina hinnäst parral aol sanna lava ala pümehehe nulka är käknü. Sääl ma sis oodi, kunas tuu verelaskminõ nakkas. Ku naasõ üteh verelaskjaga sanna tulliva, sis sai ka mina tiidä, õt minno otsiti joba kõkkõ küllä piteh takah, käüti esiki oja veerest otsmah.
Nan’a oll’ kah üteh tõistõga sanna tulnu. Timä pallõl’ naisi, õt nimä lasõsi timäl kõgõ edimädsenä verd. Kiä toda ette tiid, ku pall’o viil latsõ otsmisõs aigu kulus. Kõik, mis edesi toimu, om viil täämbädseni meeleh.
Ma õs näe häste, minka tuu verelaskja tekk’ nan’a sälä pääle noid haavu, a toda näi ma häste, õt nanal nakas’ sälgä piteh veri alla juuskma. Toda ma külh tiidse, õt koh juusk veri, sääl om surm kah lähkoh. Üte kõrraga panni ma sääl sannalava all suurõ helüga ikma: «Nan’akõnõ, õi tohe är koolda!»
Minno tõmmati lava alt vällä, hõigati imä sanna mano, anti minno imä kätte. Imä vidi minno kättpiteh kodo poolõ, a esi kõnõl’: «Ma näüdä sullõ kotoh, kuis perse päält verd lastas.»
Verelaskmisõni asi joht õs lää, a tagaots oll’ peräh tulinõ külh. Säändse mälehtüse jäivä mullõ verelaskmisõst.
Ämariku Volli Räpinält
Siilabergi suu ja riigimõtsa vaihõl oll’ üts illos neläkandilinõ maatükk (6,2 ha) ja ku mu esä sinnä 1930. aastagal põhitalost elämä tull’, sõs nakati õkva ehitämä ja kõgõ inne ehitedi sann – tuuperäst, et oodõti majja neländät last.
Ku ma sündü, sõs ollõv tuudu sanna minno vasta võtma Jaanimõisa takast küläst Tsiaoro Miina, kes oll’ tuukõrdnõ ämmämuur sääl kandin.
Mi umal eloaol saimi kõik kuvvõkõistõ sannan kävvü ja lihha suidsuta. Oll’ vaia lihha suidsutama nakada keväjäpühis. Tollõs aos oll’ liha joba parras suuldunu kah. A tiidäki omma keväjäpuulõ ilma joba lämmämbä ja es olõ vaia lihasuidsutamisõs väega pall’o küttä. Küttä innemb pikembält ja kõgõ perän rohkõmb.
Nii ollõvgi esäl edimädse lihasuidsutamisõ tullõm olnu, et rasvatsõst lihast jäänü põrmandulõ ja panne pääle õnnõ kamara.
Palli Elsa Väimäläst
|
Pääleht