Timahavanõ kuum suvi and’ mõttõ, et võinu pruuvi tetä päävä käen süvvä. Muial ilman om seo joba peris harilik, a õks meist lõuna puul (lüü Internetti solar cooking nink pilte ja linke tulõ ku pall’o).
Tulõ vällä, et ka Eesti-sugutsõl põh’amaal om tävveste võimalik õnnõ pääväpaistõl süvvä tetä.
Inne lõunat (10-11 paiku) säet üles ja kolmõ-nellä aigu om valmis. Olõ õi vaia valva ega tuld kobista ega pellädä, et põhja kõrvõs.
Pääväahoga om söögitegemine tävveste hoolõlda, paar kõrda piät kaema, et päiv õks kõrraligult ahjo sisse paistus ja piigli kõrraligult paigan omma. Ma olõ pruuvnu vorstikõisi kütsä ja kardokat havvuta ja omma hää saanu külh. Arvada, et saat ka kaalõ ja põrknit ja kapstit havvuta, või olla ka et putru tetä, ma olõ õi viil kõkkõ pruuvnu.
Pääväaho tegemine olõ õi rassõ, eski latsõ tulõva taaga toimõ. Kats pappkasti tõnõ tõsõ sisse ja katõ kasti vaihõlõ nördsütedüid vannu aolehti, et sisemädsest kastist lämmi vällä es päsenü.
Sisemäne kast seest mustas värmi ja klaastahvli (vai kogoni kats) kastilõ pääle, õks tuus, et lämmi seen püsünü.
Ja sõs kast päävä kätte nink paari piigliga päiv kasti sisse laskõ. Tahat kuumõmbat, panõ piigliid mano.
Pruuvkõ no kiäki tõnõ kah.
Kuuba Rainer
| | |
|
Pääleht
