Sõmmõrpalu vallan Haidakul või nätä väega värvikireviid hernetontõ.
Nuu omma valmis tennü vellepoja Parijõe Rainer (15) ja Kristen (13).
Hernetondi pää jaos võti nä vana plastmasskanistri, kohe pääle oll’ hää nitrovärvega hirmsat verevät näku maali.
Sälgä panti vana Parijõe rõiva, nii et nüüt kutsvagi uma talu rahvas ja ka külärahvas tiile lähkümbät ja uhkõmbat tonti Jüris. Kätte panti verrev lipp, nii et mõnõlõ tulõtas tuu tont hoobis sõakat Punaarmee veteraani miilde.
Vanaimä Parijõe Viivi ütel’, et tä kässe tondi tetä maas’kit kaitsma.
Harak ollõv iks tõtõst kavvõmbalõ hoitma naanu, a varõssõ, nuu häbemädä tsirgu, es tunnõ määnestki hirmu ja haari maas’kit õkva hernetondi kõrvalt. Et vannu pükse üts haru oll’ är lõigat, tettigi edimäne tont üte jalaga, säält tull’ ka verevä lipu mõtõ. «Poisi omma andõka, ei olõ midägi üteldä,» võtt’ Parijõe Viivi jutu kokku.
Saarõ Evar
| |
|