| |  Pääleht |
| Uudissõ |
| Märgotus |
| Kultuur |
| Vana-Võromaa |
| Ummamuudu |
|
|
|
2.–6. põimukuu pääväni opsõ nii maa- ku liinalatsõ Pikäkannun ravihaino tundma. Latsõ teivä sõidu Süvähavva luudustallo, sääl tekk’ pernaanõ Pedäjä Reet esieräliidsi haino tutvas: vereurmarohi, väiku paiulill, kärnoblikas.
Kõrva taadõ panti, et ka harilik puju ja naat võiva inemisele tarviligu olla. Ja et mõni hain om külh kihvtinõ, a ku tuud õigõhe pruuki, sis avitas tervüst tuvva.
Oraperä ökotalo pernaasõ Kutkini Liisi man saiva latsõ esi hääd tsäihaina – põldristikut – kor’ada. Sääl talon kasus ka väega esieräline uba – tuu kõdra kasusõ nikani ku miitre pikkudsõs! Korjat kolm kõtra ja omgi õdagusüük valmis.
Söögi sisse soovit’ Oraperä pernaanõ soola ja pipra asõmõl pruuvi aid- ja mägipiparhaina.
Tull’ vällä, et häid ja kasulikkõ tsäihaino kasus ka peris Pikäkannu koolitarõ lähkül.
Suurõmba latsõ saiva vastutusrikka ülesandõ: löüdä mõtsast Eesti kõgõ kihvtidsõmb kasv: näsiniin.
Egä õdagu meisterdi latsõ luudusligõst matõrjaalõst asjo, noid saa sügüse nätä Võromaa muusõumin.
Laagri jaos and’ rahha Keskkunnainvesteeringide keskus.
Tamra Ave
| | |
|
|
| | | | | | Uma Lehe välläandmist tugõva Vana Võromaa Kultuuriprogramm ja | | | | | | |
|
|
|
