| Pääleht |
Uudissõ |
Märgotus |
Elo |
|
|
|
| Laul om Kasaritsa mäki pääl linnanu 140 aastat | | Valpri Liina |
10. mahlakuul tähüst’ Kolepi segäkuur Puiga rahvamajan kontsõrdiga 140. juubõlit.
Koori kavan olli õnnõ eesti viisimeistride laulu. Viil laulti eelmädse koorijuhi Tamra Ako säetüt «Hällilaulu». Seo sügüse tulõ Tamra Ako 80. sünnüaastapäiv. Ja viil põrotõdi maaha üts vahva «Tuljak»: tuu laulu ettelaulminõ tekk’ koorilõ minevä aasta vallalõ tii pääliina üldlaulupidolõ.
«Tuljakut» juhatama kutsuti Vare Sale, kiä juhat’ Kolepi laulukuuri pia 30 aastat.
«Meil om uma kant, uma rõõmu ja murrõ, mis põh’aeestläisi ei huvida. Istumi tan Eestimaa veerekese pääl ja mugu laulami,» ütel’ laulõ vällähõikaja, koorilaulja Laine Maia. Tuu jutu pääle võtt’ kuur üles Ritsingu Alo säet rahvaligu laulu «Istsõ ma maailma veerekese pääle».
Takkaperrä tulli eurolaulõ kirotaja Pajusaarõ Priidu «Võromaa laulu» (sõnno autor Ilvese Aapo) ni Banderi Ara «Ku olõsi» (sõna Iheri Rihhard). Koori järgmäne suurõmb etteastminõ omgi võrokiilsel laulupidol Uma Pido Põlvan.
Laulõ vaihõpääl astõ üles külälise: Kungla puhkpilliorkestri ni Osula kooli laululatsõ.
Kolepi kuur om Võromaa kõgõ vanõmb laulukuur, mille koolioppaja Kõivu Jaan tekk’ aasta päält edimäst üldlaulupito: 1870. Timä pojapoig Jaan juhtsõ kuuri pia 40 aastat. Parhillanõ juht Banderi Ara om kuuri juhtnu 2000. aastast pääle.
| | |
|
|
|