|
|
| | | Katõsa näütemängu, poolõ võro keelen | | |
Viitinä mehe Pähnä Raimondi kirotõdu näütemängõ raamadu «Katõsa näütemängu» edimäne näütämine oll’ puulpäävä, 23. vahtsõaastakuul (Raimondi 76. sünnüpäiv) Viitinä mõisamajan.
«Ma olõ elupõlinõ võru miis, võru kiil om mullõ umanõ ja armas. Kiroda as’ust, minkast ma arvu saa. Kõik tan kaasi vaihel om elust võet, a veidikese om ka umalt puult manu pant. Ma olõ tahtnu niimuudu kirota, et näid olõs lava pääle säädi hää ja et nä kõlbasi maal mängmises,» ütel’ autor.
Pähnä Raimondi näütemängõga omma rahva ette astnu Rõugõ ja Viitinä tiatritegijä. «Pööräst unõnäko» omma rõugõlasõ mängnü umakandi rahvalõ ni andnu muialpuul külälisetendüisi. Laembalt tunnõt om ka «Pööripäev», minka om koguni Võrun ülevaatusõl käüt.
Seokõrd sai nätä juppi nal’atüküst «Kõrged külalised» Surju rahvamaja näütetsõõri ettekandõn.
Näütemänguraamadu vällätulõgi iist kanè huult Pähnä Raimondi tütär Kostabi Ingrid. Raamadu kiräst’ OÜ Piip Tal’nast. Kaasõpildi pääl om Pähnä Raimondi projekti perrä ehitet Viitinä laululava, kaasõ veere pääl rahvarõivavüü. Säändse vüü omma koedu Pähnä Raimondi vällämõtõldu ja tettü massinaga. Langu värvmine ja vüüle viimädse vurhvi andminõ om Raimondi naasõ Elfriede hoolõs.
Valpri Liina
| | |
|
|
|
Pääleht
