| |  Pääleht |
| Uudissõ |
| Elo |
| Märgotus |
| | |
|
|
| | | Võrol tulõ Valgõ käsitüünäütüs | | | 25.11–20.12 kõrraldasõ Näputüüselts ja Võromaa muusõum käsitüünäütüse «Valge +». Käsitüüd võiva näütüsele kaemisõs tuvva kõik meistri, mitte õnnõ Võro maakunna uma.
«Valgõ pluss sai tuuperäst nimes pantus, et olõssi üts köütvä sõna «valgõ» ja «pluss» om sis ütskõik mis sinnä mano lätt,» seletäs ettevõtmisõ kõrraldaja, MTÜ Näputüüseldsi juhatusõ liigõ Sepä Marika. «Või näütüses olla must kamps valgõ täpiga – «Valgõ» omgi sis tuu täpp!»
Näütüsele või tuvva ütskõik mändsest matõrjaalist käsitüüd. Tuudki massa-i pelädä, et käsitüüd ülearvo pall’o saa. «Ku tuvvas veidemb asjo, teemi näütüse muusõumi väikun saalin, ku inämb asjo, sis suurõn,» kõnõl’ Sepä Marika.
Näütüse jaos mõtõld käsitüü tulõssi viiä ildampa 20. märdikuu pääväs (20.11) Võromaa muusõummi.
Näputüüselts plaan ka edespite vanal Võromaal käsitüütegemist härgütä. Seldsi vidämisel om luud vana Võromaa käsitüükogo. Tuu tähendäs andmõbaasi, kohe om kor’at kokko teedüst näputüümeistride, a ka rahvapillimängjide, vanaperädse söögi tegijide ja tõisi meistride kotsilõ. Kogon om teedüst inämb ku saast meistrist.
Sepä Marika ütel’, et tulõman om viil konkurssõ ja näütüisi. Tulõva aasta algusõn om uuta käsitüükonkurssi ja keväjä tuu konkursi näütüst kah.
Harju Ülle
|
|
|
|
