| |  Pääleht |
| Uudissõ |
| Elo |
| Märgotus |
| | |
|
|
| | | Äpärdüs must’kamõtsan | | | | Liberi Malle | | | | Tuu võisõ olla vast 2003. aastaga suvõl, ku võtsõ sõbranna üten mõtsa must’kit korjama:ütsindä jo ikäv minnä.
Minnä oll’ kolm kilomiitret. Must’ka massiva sis katõssa kruuni kilo. Pangitävve iist oll’ saia 64 kruuni.
Lätsimi rattidõga. Algusõn oll’ hõrrõ värk. A sis löüdsemi hää platsi. Korssimi massinaga.
Mu seldsilisel olli määndsegi pikä pemberkpüksi humanitaarist ostõdu. Kuuma ilma peräst es olõ tä näile midägi alla pandnu.
Korssi, korssi ja kõrraga kai: sõbrannal püksi lahki lännü ja mullõ vahtsõ vasta pal’as persepuul.
Ma naarsõ põlvilõ maan, sõbranna naard’ mukka üten, ka põlvilõ maan. A tä es saa as’ast arvo, es tiiä, midä ma naara.
Tsipa aigu võtt’, ku ma põhjust üteldä sai. Sõbranna tõmmas’ sis püksi maaha, nii olli katski, et edeots ka lahki.
Kässe minnu kodu pükse perrä minnä. Ma es olõ nõun – mul oll’ õnnõ puul pangi marju. Korssimi sis iks pangi täüs. Õnnõs oll’ täl pikk pluusõ, mis midägi iks är käkse.
Kodo sõitõn kässe tä mul rattaga takan sõita, et olõs iks kimmäs, et midägi ei vilgu.
| | | | | | Tossu Tilda pajatusõ | | | | Halv külätii | | | Süväl Vinne aol käve Võromaa üte piiripäälse külä noorõ sakõstõ läbi Läti nuuriga. Tuud nimmati rahvidõ sõprusõs.
Läti poiss, kiä päält tandsuõdagut oll’ uma eesti silmärõõmu kodo saatnu, kaivas’ hummogu, et külän omma väega halva tii. Pall’o ahtagõsõ, nii et kattõ jalga ei saa kõrvuisi maaha panda.
Tuu jutt paistu Võromaa külänuurilõ muidoki ülearvo ands’ak.
Perän tull’ vällä, et lätlane oll’ pümmen õigõ tii päält är essünü ja külä pindremaa pääle trehvänü.
Niimuudu tä sääl lavaraamõ piten magamiskotussõ poolõ ukõrd’. Pääleki oll’ noorõl mehel pää armastusõst ja ohtralõ juudust kodoõllõst segäne.
| | |
| Võro liina 225. sünnüpäävä viktoriin | | | 1. Määne näist om Võro liina tunnislausõ?
a. Üts ummamuudu liin
b. Tan liinan võit pruuki võro kiilt
c. Uma ja hää liin
2. Võro liin telse 220. juubõlis uma ollõ (tetti 4000 pudõlit). Kuis oll’ tuu ollõ nimi?
a. Hüvä kraam
b. Hää juuk
c. Võro ollõkõnõ
3. Kiä om parhilla kõgõ vanõmb Võro liina inemine (100aastanõ)?
a. Kütke Marie
b. Tikmani Salme
c. Raudsepä Julie
4. Mändsit nimmi om umal aol kandnu parhillanõ Jüri uulits?
a.Georgi ja Lenini
b. Lenini ja Stalini
c. Aleksandri ja Nikolai
5. Määndse uulidsa nuka pääl oll’ kuulsa Tiganigu puut?
a. Kesk ja Riia
b. Petseri ja Riia
c. Gorki ja Riia
6. Määne luulõtaja elli Võrol (1900–1919)? Timä luulõlõ om viie tennü Sisaski Urmas, tuu kanti ette Vabahussamba vallategemisel.
a. Adsoni Artur
b. Lattiku Jaan
c. Lõo Jaan
7. Mitu kõrda om Võrol olnu Vabariigi valitsus?
a. 3
b. 2
c. 1
8. Mille «pääliin» om Võro liin olnu?
a. koolipääliin
b. rahvatandsupääliin
c. poodipääliin
Küsümüse tekk’ Perämädse Ene
| Saatkõ vastussõ är ildampa 19. põimukuu pääväs: info@umaleht.ee vai Uma Leht, Tarto 48, 65609 Võro liin. Kolm parõmbat vastajat saava avvohinna nii Uma Lehe toimõndusõ ku ka Võro liinavalitsusõ käest.
Uma Lehe toimõndus
|
|
|
|
