| |  Pääleht |
| Uudissõ |
| Elo |
| Märgotus |
|
|
|
| | | Illos küläpäiv ilmataadi kiustõ | | |
| | | | | | Raudtii om Lepässaarõ süä | | | | |
Lepässaarõ om pikä aoluuga armsa küläkene, mink inemise teivä joba aastaga algusõst pääle tüüd, et seo kuu 13. pääväl peetü küläpäivä tetä ja inneskidse küläelänigu kodo kutsu.
Vana jaamahuunõ aknõ-ussõ olli 20 aasta iist lauduga kinni lüüdü, et maja är es laonu. Hoonõ sai vahtsõ näo.
Jaama man võeti võsu maaha, tuudi vesidse kotussõ pääle täütes liiva, tetti lillipindre ja niideti murro.
Ettevalmistus oll’ kõva, a ilmataadilõ tuu kõrda es lää: küläpääväl tull’ vihma hummogust pääle nigu pangist. Tuust huulmalda tull’ inemiisi hulga kokko. Õnnõ pääväkava tull’ väläst är jaamahuunõhe kolli.Vana jaamatarõ sai puupistü rahvast täüs ja inemiisi jakku ka perrooni pääle.
Kuna raudtii om Lepässaarõ inemiisi jaos esierälidse tähendüsega, sis tuust oll’ kõvastõ juttu: laulti laulu «Vana vaksal», õdagujuht oll’ «jaamaülemb».
Küllä oll’ kutsutu ka hulga tõisi külli rahvast. Kahkva külä oll’ ette valmistanu kava tuust, kuis tuu külä rahvas Orava jaamast rongiga Lepässaardõ pitto sõit. Laulsõ küläkapell, midä vidä viimäne Lepässaarõ jaamaülemb Koldi Hilja.
Külä aoluust kõnõl’ põh’aligult inneskine koolioppaja Moori Tamara: kõgõ parõmbil päivil oll’ Lepässaarõ raudtiijaaman tüüd 20 inemisele! Petseri-Valga-Tarto liini sõit’ reisirong neli kõrda päävän ja egä poolõ tunni takast kaubarong. 2003. aastal pidi Lepässaarõn kinni viimäne reisirong ja ka jaamahoonõ panti kinni.
Küläpäävä kõrdaminekile avidi üten Visnapuu pere, Koldi Hilja ja Lembit, Lõhmusõ Maia, Heinar, Mart ja Silvi, Moori Ruve ja Tamara, Luiga Kalle ja Galja, Järveperä Eda, Puškina Juta, Puškini Aino ja Kolja, Aganitsa Kalju, Vago Tiina ja Aigar, Rauga Artur.
2010. aastagal kõrraldas suurõ küläpäävä timahava küläkosti toonu Kahkva külä.
Pidäge iks umast küläst ja kodokandist!
Pähnä Külli, kõrraldaja
| | |
|
|
|
