Nummõr' 180 Lehekuu 5. päiv 2009 TOIMÕNDUS UMA LEHE TEL´MINE ARHIIV PÄÄHÄMÄÄRMINE (reklaam)     Pääleht   Võromaa noorõ astva ello Uudissõ   Adsoni-võistlusõl loeti kõgõ inämb Lattikut   Antslan tulõ murdõlaulu- ja luulõvõistlus Elo   Ruitlasõ imäga keväjädsen aian   Tütärlats meisterd’ mutõlauto Märgotus   Kähri Liina: ummilõ sugulaisilõ oll’ Hurda Jakob lihtsä maamiis! Ruitlasõ jutt Kirä Kaasanist Perämine külg Üts küsümüs Viktoriin   Nimi miist är ei tsurgi...   Ruitlasõ Olavi, ropp miis       Foto Alar Madisson       Rõiva Taavi ja Värgi Luisa õkvasündünüle maimukõsõlõ ollõv pant nimes Rõiva Miina Rihanna. Rõivas om ekäpiten kõrralinõ perekunnanimi, Miina jälki illos latskõsõnimi... A Rihanna? No kurat! Lei Interneti otsingulõ «Rihanna» ja sai üte niigrilaulja, kiä uma mehe käest kõik aig pessä saa. Minno naas’ huvitama, kuismuudu vällämaa inemise ummi ands’akidõ nimmiga toimõ tulõva. Naksi Internetist otsma... Ja oh imeht... Herräsmiis Putsi Kevinil om elon nii häste lännü, et timäst om viiemeistri saanu. Komposiitor. Om kirotanu muusikat sümfooniaorkõstrilõ. Pall’o kirotanu. Tõnõ soliidnõ miis Vitu Joe om treener, triin NFLin, professionaalsõn ameeriga jalgpalli liigan jalgpallimängjit. Ameeriga näütlejä, modell ja televisiooni saatõjuht Munni Olivia om sündünü Oklahoman. Olivial lätt häste, mäng filmen, telesõudõn. Päält tuu näge tä illos vällä kah. Modell piätki nägemä! Meil piät kõikaig suu kinni hoitma. Ja latsilõ ilosit nimmi pandma. Muido tulõ andmõkaitsõinspektsioon ja alostas väärteomenetlüst. A ku läät Internetiaadrõssi www.persegirls.com pääle, näet, et Ameerigan om vabahus ja kõik om lubat ni normaalnõ, persetütrigõlõ om tävveste umaette kuul tett. Opva sääl ja saava targas... Aokiränik Joseph J. Sitt näütüses tege uudissit. Või-olla et tege ka sittõ uudissit... A nimi ei olõ tedä kõrdagi segänü, nime peräst ei olõ Sita Joseph elo seen kannatama pidänü... Mis meil siin uma Eestimaa pääl säändsele vabahusõlõ ja lepligadsõlõ olõkilõ vasta panda om? Kuimuudu ma koolin käve, mälehtä külh. Kõrd sai Ruitlasõst Röhlanõ, sõs Ruiklanõ, sõs jälleki olli lihtsäle Ruik. Kõik kooliseldsilidse naariva minno tsias... Nüüt tsiagripp tulõ ja mass kätte, paras, ega ülekohus karistamalda ei jää... A Seedri Helir-Valdor? Midä timä koolin pidi mõtlõma. Ku kõik aig narriti? Kaegõ nüüt, hiussit pään ei olõ ja europarlamenti ei tükiki. Är murti miis joba koolipingin... Olõs Putsi Kevinit koolipingin kiäki niimuudu narnu, olõs illos sümfoonia «John Browni kihä» olõmalda... Tulõ taivas appi, ütelnü seo pääle Andsip, a ku Interneti kaudu jumala poolõ pöörüt ja lövvät iist lingi Angõrja Essändä Taivaminemise Kogohusõlõ, om selge, et siin ei avida taivas kah. Ei jõvva tuu angõrjas kah ütsindä sääl üllen inemiisi vällämärgitüsi asjo vasta...       Uma Internetin   Võro-Eesti sõnaraamat!!!