| Pääleht |
Uudissõ |
Elo |
Märgotus |
|
|
|
| Viil tunnustust Uma Pido tegijile | | Üle-Eestilidsel konkursil «Suhtekorraldustegu 2008» sai innovatsiooni- vai vahtsõndusõ-avvohinna Umalõ Pidolõ kutsmisõ kõrraldaminõ, mille avit’ tetä luumisütisüs Maailm.
«Tuu konkursi mõtõ oll’ ette nõsta minevaastaidsi häid suhtõkõrraldustegosit nii ärin, avaligun elon ku mittetulundusühingite tegemiisin,» selet’ ütisüse juht Peetsalu Erkki, kiä eläs ja tege tüüd Haanimaal. «Mitteäriliidsi ettevõtmiisi pääpreemiä anti üle-Eestilidsele «Teeme Ära!» kampaanialõ, Uma Pido sai luumisväe ja uma kogokunna ütenhaardmisõ iist innovatsioonipreemiä.»
Tuu tähendäs, et tunnustõdi Uma Pido ummamuudu teedüst: kõrraldõdi «Uma Laulu» konkurss, pito reklaamsõ Lauritsa Piitre perädüsuurõ fotopildi «Lõunõhummogumaa» päält maaha astnu tegeläse, näide siän Uma Pido pääkõrraldaja. Kitmist väärt oll’ ka miihikoori «Mehe mõtsast» luuminõ ja dokfilm Uma Pido tegemisest.
Ütte Uma Pido vidäjät tunnust’ avvonimega ka Võro vald: Uma Pido laulukuurõ üldjuht Otsari Silja nimmati 2008. aastaga kultuurielo edesiviijäs.
UL
|
|
|
|