| |  Pääleht |
| Uudissõ |
| Elo |
| Märgotus |
|
|
|
Eesti riigi aastapääväs sai valmis Sõmmõrpalu valla aabits «Kodukotus». Raamatut tutvustõdi 23. radokuul Osola koolin aastapääväaktusõl.
Uma valla aabidsa valmissaamisõ man oll’ pall’o häid inemiisi. Kõgõpäält tulõ märki Osola koolioppajat Saarõ Heljot, kiä nuuri kodouurjidõga om vällä märknü kotusõperimüst ja tõisi juttõ, ni Sõmmõrpalu Lepatriinu latsiaia oppõalajuhatajat Otsa Kerstit, kiä kirot’ aabidsajutu. Aabidsajuttõn rändäse koduvallan väiku Katre uma vanaimäga ja kõnõlõsõ, midä nägevä. Kodukotusõ tundmaopmisõ man saava latsõ ka kirätähtiga tutvas. Aabitsast saa lukõ luulõtust ja ütlemiisi võru keelen. Tuuperäst, et eletäs Võrumaal, uma keele keskel. Pildi joonisti latsiaialatsõ, kiä parhilla opva Osola ja Sõmmõrpalu kooli 1. klassin. Raamadu kujond’ Sarvõ Triinu.
Ilosa kingitüse saiva aastapääväaktusõl Sõmmõrpalo valla kuulõ 1. klassi ja latsiaia latsõ: uma kodukotusõ aabidsa.
Aabidsa and’ vällä Osola põhikuul kuuntüün Sõmmõrpalu latsiaiaga, tugõsiva Sõmmõrpalu vald, kultuuriministeerium ja kultuurkapital.
Innembi om kodukotusõ aabits vällä tulnu Vormsi saarõl, Sõmmõrpalu valla uma om tõõnõ.
Valpri Liina
| | |
|
|
|
