Nummõr' 154 Lehekuu 6. päiv 2008 TOIMÕNDUS OTSI UMA LEHE TEL´MINE ARHIIV PÄÄHÄMÄÄRMINE (reklaam)     Pääleht   Võromaa sai hulga puhtambas! Uudissõ   Räpinä tiatritegejä opva suvõtükkü   Film Uma Pido tegemisest   «Uma laulu» võistluslaulõ tull’ mitmõst Võromaa nukast   Peeti Adsoni-võistlust Elo   Lehekuu lillihäitsme imäle   Ilosa sõna võrokõisi meelest Märgotus   Valgu Jaanis: võrokõisi vägi tulõ keele kaudu vällä   Tühi poodipääliin Kirä Perämine külg     «Uma laulu» võistluslaulõ tull’ mitmõst Võromaa nukast   Harju Ülle ylle@umaleht.ee       Ojamõtsa Karla.       25. mahlakuul peet vahtsidõ võrokeelitside laulõ võistlusõ võit’ Räpinä miis Ilvesse Aapo ummi laulõga «Pristan» ja «Lodi tuu ja lodi vii». A võistlusõl lei üten viil mitmit põnõvit laulumeistrit, üts näist oll’ Misso miis Ojamõtsa Karla (69). «Ma olõ suhvlihe külh kirotanu laulõ, a viil nätäl tagasi sai seo laul sändse kujo, nigu võistlusõlõ saadi,» selet’ Karla päiv inne lauluvõistlust. Tä tulõt’ latsõpõlvõ viie miilde, kirot’ üles, kobist’ sõnno kah ja läts’. «Seo lugu om tegeligult mu latsõlatsõlõ Indrekulõ kirotõt, tä eläs Talina lähkül,» kõnõlõs Karla. «Tuu käü suvõl kõikaig siiä, ma tii tälle lava, naabriplikaga sis laulva ja mängvä. No tuu «Tii» laul, võrokiilne, toda nä laulõva siin. Sõs mõtli kirota poiskõsõlõ üte kõrralidsõ laulu.Tä võitsõ üte umaiäliidsi lauluvõistlusõ är ja sõs ma mõtli, et saa-i sis poiskõsõlõ laulu tettüs!» Karlal om neli latsõlast ja kõik omma «muusiga poolõ veitkene viltu» – vanaesä muudu. «Ma olõ sääne esiopja veli, a Tamra Ako man ma iks laulsõ tenorit hulga aigo,» ütles Karla. «Sis om meil Misso miihikuur, saimi ütskõrd esiki laureaadis: 1986 vai midägi sinnä kanti. Pensionäris naksi, sis opõ klarnedimängu är. Ma soovida kõigilõ, kellel midägi tetä ei olõ pensioniiän – pruuvkõ klarnedimäng är oppi!» Hindä laulu saat’ Karla kidraga, mille tõi tälle Kõllustõ Kuldar (Kõllustõ Tiidu lelläpoig), pill om Roodsist tuud ja püsüs timmin. «Ku sa tahat teedä kõõ parõmbat luku, mis mullõ miilde om jäänü, sis tuu oll’ Lolita Torrese... mis tuu filmi nimi oll’... «Armastusõ igä», a tuud ei olõ kah’us inämb koskilt kuulda,» seletäs Karla. «Ma olõ sääne poiss, et opõ massinaehitüst, tüüti hulga aigo Vahtsõliinan, viimäte olli sääl pääenergeetik,» kõnõlõs Karla umast elokäügist. «Sis panti minno siiä ülembäs ja siin ma sis olli. Kõik taa ao, 1977. aastast pääle.» A peri omgi Karla Vahtsõliinast, Asundusõst. Tõnõ tunnõt Ojamets – Aadu – om timä vanõmba vele poig. Karlal om kolm velle ja kolm sõsard, suguvõsa vidä joba 130 liikmõ pääle är.     Uma Laulu võistlusõ tulõmusõ: Ilvesse Aapo – pääavvohind laulõ «Pristan» ja «Lodi tuu ja lodi vii» iist Hainsoo Minna – Eesti Rahvaluulõ arhiivi eräavvohind väega hää vana rahvalaulu moodu perrä tett laulu «Kuulatsõ kulätamah» iist, päält tuu ka Rüütli Ingridi eräavvohind Kalla Urmas – Eesti Rahvaluulõ arhiivi eräavvohind väega hüvvi vana rahvalaulu moodu perrä tettüisi laulõ iist. Videri Koidu – elorõõmu avvohind laulu «Miil ei olõ mõro» iist Kelbi Linda – helkäjä avvohind laulõ «Laadõlaul», «Lilliäri» ja «Mis tuu putus minolõ?» iist Rahmani Jan – vaimukusõ avvohind laulu «Kahrukõnõ, kullakõnõ» iist Ojamõtsa Karl – teno kõgõ fantaasiarikkamba laulu «Pullijärve legend» iist Hõimu Selma – Eesti Kirändüsmuusõumi eräavvohind ummi vanõmbidõ laulõ avvo seen hoitmisõ iist Kalkuna Mari – kõgõ parõmba viiemeistre ja ettelaulja avvohind Rahmani Jan, Valpri Valdo ja Ojamaa Indrek – laul «Elu om nii upakil», avvohind poliitilidsõ tsuskmise iist Contra – tenokiri kõgõ vaimukambidõ riime iist laulun «Inemise omma eläjä» Hoobi Indrek – latsilaulu avvohind laulu «Pudrulaul» iist Kokko võistli 26 laulu, näid hinnas’ žürii iinotsan Rüütli Ingridiga. Kõik «Uma laulu» võistlusõlõ saadõdu käsikirä ja ülesvõet võistluskontsõrt andas üle Eesti rahvaluulõ arhiivilõ.         Uma Internetin   Võro-Eesti sõnaraamat!!!       Uma Lehe sõbõr!