| |  Pääleht |
| Uudissõ |
| Elo |
| Märgotus |
| | |
|
|
| | | Sännä mõisan peeti Adsoni päivä |
| | | | | | | | | | Räti Karolin lugi luulõtust nigu peris näütlejä. | | Pärna Janek oll’ algklassilatsist kõgõ parõmb lugõja. | | | | | | |
Riidi, 7. mahlakuu pääväl tull’ Sännä mõisalõ ütsäst Võromaa koolist 23 last üten oppajidega, et tetä võrukiilse luulõ lugõmisõ võistlust.
Kõgõ noorõmbitest, 1. – 4. klassi latsist tunnistõdi pääavvuhinna (Tauli Anu kujondõt hammõ) väärilidses Pärna Janek Rõugõ kooli 4. klassist, kiä lugi väega suurõ ütenelämisega Artur Adsoni luulõtust «Vahetund». Janeki oppaja Paasi Maia löüdse, et Janekile kõlvas’ sääne luulõtus. Janek tull’ edimädses ka minevaasta Adsoni pääväl.
5. – 9. klassi lugõjidõ hulgast nimmati pääavvuhinna saajas Kääpä kooli 7. klassi tütrik Räti Karolin (oppaja Aidma Hele ja Kähri Jana). Iheri Rihhardi luulõtust «Silmä» lugõdõn oll’ Karolin õkva nigu peris näütlejä.
Karolini pidi savist hobõsõravvaga meelen ka MTÜ Sänna Mõisakeskus. Mõisakeskusõ puult sai savist pinikese Lepistü poiskõnõ Paali Alvar Rahmani Jani luulõtusõ «Uni» ettekandmisõ iist.
Pääle tuu anti viil härgütüsavvuhindu, kutsit Kaika suvõülikuuli ja keväjädsele Võromaa reisile. Suurõ julgusõ preemiä sai Kõlli Kersti Parksepä keskkooli 12b klassist. Tä oll’ kõgõ vanõmban astmõn ütsainus luulõlugõja.
Kõik oppaja saiva kingis Kauksi Ülle «Imäplaadi».
Adsoni-võistlusõl kävve latsõ Vahtsõliina, Varstu, Kääpä, Parksepä, Haani, Krabi, Rõugõ, Lepistü ja Pikäkannu koolist.
Latsi hinnas’ žürii, kon olli Nele Reimann-Truija ja Fastrõ Mariko Võru Instituudist, Rõugõ kultuurijuhtja Köötsi Riina ja luulõtaja Contra. | | | | | | Mis sa arvat? |
|
|
|
