|
Pall'o omma muheldõn kaenu, kuis üts' must lehm süü rahuligult sügüsest haina kesk Võro liina – Räpinä tii veeren vahtsõ perädü spordihuunõ lähkül.
Lehm pelgä-i sukugi inemiisi – ku kiäki timä mant bussijaama poolõ käänd, sis tulõ õkva võõrast nuhutama.
Tuu lehm om mustlaisi uma, tiid salaperädse liinalehmä kotsilõ kõnõlda ehitüsmiis', kiä eläs lehmäga saman uulitsan.
Noil mustlaisil ollõv lehm olnu aigõ algusõst pääle, no mitte muidoki taasama. Inneskidse lehmä olnu tsipa kimmämbä kah, seo perämäne om no niruvõitu.
Mustlasõl om sulanõ(!), kiä vii lehmä Räpinä tii viirde süümä. Ehitüsmiis kõnõl', et uulitsan olõ-i lehmä peräst suurt tüllü, naabri vaihõpääl kaibasõ, et elläi sitt uulidsa täüs.
Harju Ülle | |
|
|
|