Põimukuu perämädsel pääväl (30.08) kirot' Uma Leht tuust, kuis kiräimä Kauksi Üllele kingiti «võru kiil'». Man oll' ka pilt, kuis puutüümeistri Otsa Hannes pirakat «kiilt» üle and.
Säält tull' mõtõ, et «võru kiil'» väikumbal kujul võinuki olla üts' Võrumaa meelüs (eesti keeli meene, suveniir).
Võrulasõ olõ-i hädän matrjokadõ uputusõga, a Võrumaalõ umadsõ kaubaga saa-i keksi kah. Miilde tulõva Haanimehe kujukõsõ ja Munamäe torniga sainaplaadi, midägi näpuotsast viil.
Ummõhtõ om uma kiil' tuu, mille perrä meid võrukõisi laembalt tundas! Meelüssel võinu määnegi egäpääväne ülesannõ ka olla, näütüses märkmepapridõ vai visiitkaartõ hoitja.
Valpri Liina, võrukõnõ
|